بكلمات مؤثرة.. صلاح ولي يروي رحلة التحول والتوبة ويدعو للسودان بالأمن والسلام
الخرطوم: فوري نيوز
كتب الفنان المعتزل صلاح ولي عن تفاصيل مؤثرة من رحلة التحول التي عاشها خلال الفترة الماضية، مؤكداً أنه مرّ بأصعب أيام حياته، قبل أن يجد الطمأنينة والراحة في التقرب إلى الله، داعياً الجميع إلى عدم الحكم على الناس من خلال ماضيهم.
وفي رسالة نشرها عبر صفحته على مواقع التواصل الاجتماعي قال فيها 👇
الحمد لله على كل حال. 🤍
يمكن في ناس عرفوني في زمن النطيط والغناء، وأنا ما ح أنكر الماضي، لأنو جزء من حياتي. لكن ربنا سبحانه وتعالى بغيّر الحال، وباب التوبة مفتوح لأي زول مهما كان ماضيهو.
والله يا جماعة مريت بفترة من أصعب الفترات في حياتي، وفهمت إنو الدنيا دي ما دايمة، وما في راحة حقيقية إلا لمن الواحد يقرب من ربنا.
أنا ما بكتب الكلام ده عشان أقول إني بقيت شيخ، ولا عشان أقول إني ما بغلط. لا والله… أنا زول زي أي زول، عندي تقصير، وبجاهد نفسي كل يوم، ومحتاج دعواتكم أكتر من أي حاجة.
لو في حاجة اتعلمتها من الحياة، فهي إنو ما تحكم على زول من ماضيهو. يمكن الزول البتشوفو اليوم بعيد، بكرة يكون أقرب لربنا منك ومني. والهداية دي نعمة من الله، ما بجهد زول ولا بشطارتو.
كل المطلوب منكم تدعوا لي بالثبات، لأنو الثبات أصعب من البداية، وأسأل الله يغفر لي كل ما فات، ويصلح حالي وحالكم.
وربنا يصلح حال السودان، ويحفظ أهلنا، ويلم شملنا، ويكتب لبلدنا الأمن والسلام، ويخفف عن كل زول فقد عزيز أو شردته الظروف.
وأخيراً… لو في يوم كنت سبب في فرحة زول، أو في يوم أخطأت في حق زول، أسأل الله يغفر لي، ويجعل خاتمتنا كلنا خاتمة خير.
اللهم ثبتنا على طاعتك، ولا تزغ قلوبنا بعد إذ هديتنا. 🤍
صلاح ولي
#فوري نيوز #الفنان #صلاح ولي
