رحيل العندليب .. وحزن الدليب …

رحيل العندليب .. وحزن الدليب …!!!؟؟

صديق احمد .. هاك آخرة الرسايل وماني داير منك الرد

عبد العظيم سعيد .. يكتب بمداد الحزن والأسى والدم والدموع …!!!؟؟؟

قي يوم الأربعاء 26 مارس من العام 2025م من مستشفى كريمه بلغنا نبأ رحيل الفنان القامة .. صديق أحمد ..

1.. رحل الغمام سكت الرباب وانهد كتف من أركان الطنمبور برحيل الفنان القامة البلبل الصداح والكروان المغرد صاحب الصوت الشجي والحنجرة الذهبية .. واللحن والإيقاع الآسر .. الأستاذ الكبير صديق أحمد .. الفنان المبدع المتفرد الذي شكل ولون وجمل كل المساحات الخضر في وجدان الشعب السوداني بجميل الأغاني وحلو الأهازيج وأعذب الألحان بأنغام الطنمبور .. ومنذ بداياته الفنيه الأولى في أوآخر الستينات بمسرح النيل بمدينة عطبرة .. ظل يشنف الأسماع بحلو الأغاني وجميل الألحان ..

2..أبيض الفاطر من الصين وبسمو يدوبو المجانين يا موحمد دا بلودو ووين ..تستحي القمرا من الجبين وجوز عيونو سهامن سنين ياموحمد دا بلودو ووين ..

3..وأنا المعجب أنا المشتاق ..عيوني بلاكي ما شافت يمين كوكب .. شويه ريدا ليه ياصيدا ما دا أنا المتيم تب ..

4..ويازمان بالله اشهد وهاك آخرة الرسايل وماني داير منك الرد أنا .. ويازمان بالله اشهد ان صديقا قد رحل وخلف فينا حزنا مقيما واسى ولوعة ..

5.. وريدكم لي شديد يا يابا .. ريدي أنا للبريدو شددديد إلا أنا ما معاكم ديما .. لكن من حبيبي بعيد .. وداير يابا أمشي وازوره يمكن شوفتو ليا تفيد ..

6..وشايله صفيحي وأردة وشاديه قليبي ليه عبدك عبادة مع البنوت … وصفايح نوري أعلنت الحدادا مع البنوت ..

7..وأعياد تجي وأعياد تفوت والفرحة تصحب كل عيد تغشى البيوت وأنا كلما استقبلت عيد أحيا وأموت واطبع ملايين التهاني على الخيوط ..طولت شايل الذكرى في عيني للعيد المضى .. طولت بحسب في نجوم الليل .. يا ليل .. وأقدر في مساحات الفضاء وأكتم مشاعري على الألم أروضا ..

8.. وغير ذلك الكثير الكثير في مسيرة هذا الفنان الشامخ المبدع الكبير .. أخي الراحل المقيم صديق احمد قل لي بربك كيف يحل علينا العيد وأنت بعيد ..وأنت الذي كنت تجمل أيام وليالي العيد في الأفراح والليالي الملاح بجميل الأغاني وحلو الأهازيج وقالو الحفلة بي صديق احمد .. تاني أيام العيد ..كل الشعب السوداني يطرب حينما يغني صديق احمد .. وكل شعب السودان يعرف الفنان الإنسان صديق احمد ..

9.. وبجرو ( بكاي) أحكي ليكم .. تعالوا اسمعوا ياصحابي .. وعن صديق ح أحكي ليكم تعالوا اسمعوا ياصحابي ..

10..وخلوني اللسافر أبويا لو كان في إجازة العيد .. داير اشوف حبيبي الغالي ..وداير أوفي حق الريد .. عشان يا يابا من يوم روح ما جاب لي منو بريد وما قال لي كيف ااازولي ..كيف عامل براك وحيد ..

11..أخي وصديقي وحبيي الغالي الفنان الأستاذ القامة الفنية العالية الراحل المقيم صديق احمد لقد تيتم الفرح من بعدك وإنكسر الرباب وحزن الطنمبور وبكى الدليب وهاجرت النوارس ..حزنا لفراقك واسفا عليك فواسفاه وواحزناه ..

12.. صديق أحمد يعرف الكل ويعرفه الكل .. يحب الكل ويحبه الكل ..صاحب النفس الصافية والخلق القويم والأدب الجم والتقدير والمودة والإحترام للكبير وللصغير والسماحة والبشاشة والطلاقة والقلب الكبير الذي يسع الجميع ..والدار الواسعة المرحابه والكرم الفياض والأنس اللطيف .. حليل الكان بلم الناس كل الناس .. حليل الكان بحب الناس كل الناس .. وكل الناس بحبوه ..

13..وهناااك في الشمال في أرض البطولات وميراث الحضارات في أرض النيل والنخيل ومنبع الصدق والإبداع والوفاء في أرقي وفي القرير وفي كريمة وفي الدبة وفي البركل و و و و و.. ويديكي كريمي داااك قطرا وأقفين و ( العزاء) حرا .. وجروح قلبي اللبت تبرأ ..

14.. والكل يبكي صديق ويزرف الدموع مدرارا وأنهارا على صديق .. وفي كل مكان خارج السودان المغتربين وفي كل شبر من أرض السودان الحبيب .. وهناك في الشمال ومن بين كل سبعة نخلات هنالك ثمانية يعرفن صديق احمد ويبكين صديق أحمد ..

15..أما أنا أخي الراحل المقيم صديق فقد كان حزني عليك أخرس وأبكم وأصم وتحجرت دموعي في المآقي ولم أجد عينا أبكي بها .. ( ومن ذا يعيرك عينه تبكي بها أرأيت عينا للبكاء تعار ) !!..

16..أكتب هذه الكليمات القاصرات .. ومازال الجرح رطبا ومتسعا وعريض والعبرة تعترض طريق الكلمات في حق أخي الذي لم تلده أمي ..(ورب أخ لك لم تلده أمك) ..

17..أكتبها في حق صديقي الراحل المقيم الفنان صديق احمد أكتبها وانا طريح الفراش أعاني من داء الجسد وداء الفراق ..فراق الأحبة .. وأي الأحبه إنه صديق احمد وما أدراكم بصديق احمد ..
(وقد شجاني الحمام حين تغنى بفراق الأحباب من فوق لينة) ..

18..أخي الراحل المقيم صديق احمد قد هزنا والله نبأ موتك وذهلنا للفقد الكبير
والمصاب الجلل ونحن أهلك أهل النيل والنخيل أكثر خلق الله إيمانا وصبرا وامثالا .. هزنا نحن الذين نسمع النعي كنداء الصلاة ونتعاطى الموت مثل قهوة الصباح أما لموتك وقع آخر وحزن آخر وطعم آخر حيث كنت فينا كواسطة العقد ..

19..الرحمة والمغفرة والرضوان وأعالي الجنان الفردوس الأعلى للراحل المقيم الفنان الهرم الكبير صديق احمد ..

20..إنا لله وإنا إليه راجعون ..أعزي نفسي أولا واعزي كل من يعرف الفنان صديق احمد وما أكثرهم ..ولنا عودات وعودات ..إن طالت بنا حياة.. وقريب لوكان في العمر باقي (وجروح قلبي الأبت تبرأ)
صديق احمد .. الوداع يا أغلى زول يا أحلى مشهد ..الوداع ومناي ليك إن شاء الله تسعد في جنات الفردوس يارب العالمين .

أخوك ..الحزين المكلوم .. عبدالعظيم سعيد ..

2025/3/27م

رابطة الإعلاميين / الدامر
0129028649